လက်ပံတောင်းတောင် ကြေးနီစီမံကိန်း ဖျက်သိမ်းမည်ဆိုပါက ၀မ်ပေါင်ကုမ္ပဏီဘက်မှ ဥပဒေကြောင်းအရ တရားစွဲဆိုမည်

လက်ပံတောင်းတောင် ကြေးနီစီမံကိန်း ဖျက်သိမ်းမည်ဆိုပါက ၀မ်ပေါင်ကုမ္ပဏီမှ စာချုပ်ပါ စည်းကမ်းချက်များအတိုင်း တရားစွဲဆိုသွားမည်ဖြစ်ကြောင်း ၀မ်ပေါင်ကုမ္ပဏီ၏ ရန်ကုန်ရုံး Admin မန်နေဂျာ ဦးမြင့်သိန်းက ဇန်န၀ါရီ ၂၄ ရက်တွင် Eleven Media Group သို့ တရားဝင်ပြောကြားလိုက်သည်။
နိုင်ငံတော်အစိုးရမှ အဆိုပါ လက်ပံတောင်းတောင် ကြေးနီစီမံကိန်းအား ဆက်လက်လုပ်ဆောင်ခြင်းမပြုဘဲ ဖျက်သိမ်းပါက တရားဥပဒေ လမ်းကြောင်းဖြင့်သာ ဖြေရှင်းမည်ဖြစ်ပြီး အစိုးရသို့မဟုတ် ကြားခံကုမ္ပဏီ မည်သည့်အဖွဲ့အစည်းကို တရားစွဲဆိုမည်ဆိုသည်ကိုမူ စာချုပ်အား အသေးစိတ်လေ့လာပြီးမှသာ ပြောဆိုနိုင်မည်ဖြစ်ကြောင်း ၎င်းက ဆိုသည်။
"တကယ်တမ်း စီမံကိန်းရပ်ဆိုင်းမယ်ဆိုရင် လုံးဝဖျက်သိမ်းပေါ့နော်။ စာချုပ်အရဆိုရင် ကျွန်တော်တို့ တရားစွဲမယ်။ ဘယ်သူ့ကို တရားစွဲမလဲဆိုတာတော့ စာချုပ်အပေါ် မူတည်တယ်။ စာချုပ်ကို အသေးစိတ်ကြည့်ရဦးမယ်။ ဒါပေမဲ့ ဒီကိစ္စက နောက်ဆုံးဒီလိုအခြေအနေ ရောက်သွားလို့ရှိရင် ဒီတရားဥပဒေ လမ်းကြောင်းအရ ဖြေရှင်းရမှာပဲ။ ဒါတော့ သေချာတယ်" ဟု ၎င်းက ပြောသည်။
လက်ပံတောင်းတောင် ကြေးနီစီမံကိန်းကို တရုတ်ကုမ္ပဏီတစ်ခုဖြစ်သော မြန်မာဝမ်ပေါင် မိုင်းနင်းကော့ပါးလီမီတက်နှင့် မြန်မာ့စီးပွားရေး ဦးပိုင်လီမီတက်တို့ အကျိုးတူပူးပေါင်းလုပ်ကိုင်နေခြင်း ဖြစ်ပြီး  စီမံကိန်းဧရိယာအတွင်းရှိ လယ်ယာမြေများ သိမ်းယူမှုအပြင် အခြားအကြောင်းများကြောင့် ဒေသခံများ၏ စီမံကိန်းရပ်တန့်ပေးရန် ကန့်ကွက်မှုများနှင့် ရင်ဆိုင်နေရခြင်း ဖြစ်သည်။
ထို့နောက် လက်ပံတောင်းတောင် ကြေးနီစီမံကိန်း စုံစမ်းစစ်ဆေးရေး ကော်မရှင်ကို နိုင်ငံတော်သမ္မတမှ ဖွဲ့စည်းခဲ့ပြီး အမျိုးသားဒီမိုကရေစီအဖွဲ့ချုပ် ဥက္ကဋ္ဌ ပြည်သူ့လွှတ်တော် ကိုယ်စားလှယ် ဒေါ်အောင်ဆန်းစုကြည်မှ ဥက္ကဋ္ဌအဖြစ် တာဝန်ယူကာ စစ်ဆေးမှုများ ပြုလုပ်နေဆဲဖြစ်သည်။

Source:Eleven News